شعر العامية

ذكريات طفلة

 دنفسى اكتب انا عن حبك جايلى من غير مواعيد

وكمان سلمت له قلبى من غير ولا اقول ولا اعيد

شوفتنى طفله بضفايرها داخله ع الحب جديد

شوفتنى وردة وبتفتح والقلب اخضر وبرىء

اول ماتقول راح اقابلك أفرح وأقول يوم عيد

تلاقيها حضنت شنطتها

بتدارى كسوف فرحتها

دقات قلبها بتزيد

نفسى اكتب انا عن حبك جايلى من غير مواعيد

لو فتحت ف الكراسه صورتك بتزغلل عينها

تقفل وتنام او تحلم ولا تعرف مين بخيالها

صوتك لومر بغنوة تسمعها كأنه نشيد

نفسى اكتب انا عن حبك جايلى من غير مواعيد

تقعد جنبها وتشوف همسها لو تهمس انت تقولك زيد

أسرح وياك وتاخدنى معاك وتعيش ف الحلم الفرحة تزيد

نفسى اكتب انا عن حبك جايلى من غير مواعيد

تبنى لحياتها خيال الوان

دقات قلبها بتقول دا زمان

لو جييت هتخلى القلب يقيد

نفسى اكتب انا عن حبك جايلى من غير مواعيد

وتخبى معاك اجمل اسرار

وتقول امنتك لولى محار

تمسك نبضها وتشوف ارضها

وعنيها الجنة لعمر وحيد

نفسى اكتب انا عن حبك جايلى من غير مواعيد

2

ما بيقى فى ايدى ورقة تفتكروا باعمل بيها ايه؟باكتب عن حالى وعن ايامى؟ ولا بارسم صورى واحلامى؟باعمل بيها مراكب دى تشرق ودى تغرب دى تروح ودى تروح وياما مراكب راحت ومارجعتش اصل نسيت اعمل على المركب مراكبى

الليل3

الليل مواسم على خد النهار سارح

والقلب بالوجع اتوسم 

وفيه الجرح مايبارح

والعمر فـ الهم اندفن

ولا  يلاقى  نهار طارح

ابويا الخوف وامى علمتنى

 مافيش ولا حرف لوالقريب دابح

وصوته  فى الودان ريح

وابص فى عينه

مااعرفش   لابكرة جاى  ولاامبارح

الاقى سكوت يكلمنى

ودمع الخد لو سارح

يقول للسكة بقى امتى 

تفارقى الدمع ومايبقاش 

على خدك وجع جارح

 على خدك وجع جارح؟؟؟

فى يوم تقرر ماتقومش م السرير الصبح

وتفضل نايم وتحلم

تيجى لك الأحلام تترص

(وصاية)

وتقول ياريت الحلم دة يتحقق

أكيد هايخلى الحياة أحلى

ولا ياسلام الحلم دة لو اتحقق

تبقى الدنيا هنا

وفجأة يجى لك حلم لا كابوس

تلاقيه جرس المنبه بيرررررن

ومصمم يصحيك

تقوم وووووم

فى يوم تقرر ماتقومش م السرير الصبح

وتفضل نايم وتحلم

تيجى لك الأحلام تترص

(وصاية)

وتقول ياريت الحلم دة يتحقق

أكيد هايخلى الحياة أحلى

ولا ياسلام الحلم دة لو اتحقق

تبقى الدنيا هنا

وفجأة يجى لك حلم لا كابوس

تلاقيه جرس المنبه بيرررررن

ومصمم يصحيك

تقوم وووووم

25 فبراير 201025 فبراير 2010

تنزل 

تركب عربيتك

 رايح مشوار مهم

تقف فى إشارة المرور

زحمة وكلاكسات

عيال ترمى لك مناديل

وعيال تحدف لك ورد 
وعيال تستنى تطلع تمن المناديل والورد

تقرر انك تقفل قزازالعربية

وتحبس نفسك فى اغنية
اوتقرا فى اعلان م اللى اترموا عليك

تشوف حد  تعرفه كويس قوى

يشاورلك من ورا القزاز
تعمل روحك مش شايفه
وتفتكر الايام اللى عدت عليك
وطوب الارض زارك
وهو ماجالكش

تعمل مش واخد بالك

تشغل نفسك  بسماع اغنية
يااااااااااه

دة انت نسيت تحط السى دى

لاغانيك المفضلة
ونسيت حاجاااات كتيييير

 تقرر تفتح قزاز العربية

وتغرق فى  الزحمة

والدوشة
تتفتح إشارةالمرور

 تلف   وتروح


20 مارس 2010

هنا فى حتة شعر

وكمان فى مكان تانى

حتة حلم حرامى

بيسرق المسافات

وهناك فى حتة صورة

جوايا مكسورة

بتلملم فى روحها

أفراحها مبتورة

أمانة إبقى تعالى

مرة حتى  ف حلم

أوصلح الصورة

كتبت على ورق الشجر حروف حبى

لقيت على فرع الشجر الحزن متخبى

سألت ليه الليل  كف  بالهم متحنى

قال الحزن دة مكتوب ضمى الحروف ضمى
رديت وقلت الخوف مسك الحروف منى

سبت الخلايق هناك
وجيت اتشعبطت هنافى كمى
شوفت الحروف مرايات
والحبر كان دمى

بتدخل لعبة عالموبايل

ولاعالكومبيوتر

بتبتدى اللعبة فرحان

تقول هافوز

تفضل تلعب

والكورة تنطط قدامك

تضربها وترد تانى

مش خايفة منك

ولاخايفةعلى هزيمتك

لكن اهى بتنطط

وساعات كتيرة تقع 

وتقول مش لاعب

دى لعبة مستويات

وكل مالها ما بتبقى اصعب

وتقول  ساعات هالعب بس على خفيف

ومن وقت للتانى تطمن

وتبص على الاسكور

بيزيد ولا لا

اه دة انت واد جامد

واسكورك عالى وبيزيد

وتدخل فى ادوار

وتقع وتقوم

وتقاوح

انت واللعبة وبس

مافيش حد شايفك

لا هايفرح معاك

ولا يزعل عليك

لغاية مايظهر فى اخر اللعبة

End Game

لسة غنايا ماابتداش 

ومدن السراب

فردت عالطريق غربتى

تايهة

ومش لاقية حدود للمتاهة

تعرف خطوتى

لسة بكايا مابتاداش

والسكات سكن روحى

والعين سرسبت دمعتى

ياريت يا طريق غايبة

تغيبى والهم يسيب سكتى

سجنت انا روحى

و الزمن سجانى

كتبت عالحيط

بريئة

و بالحق انا الجانى

دخلت السجن لقيت

م الحبايب كتير

والقلب مش خالى

حلمت  بالحب 

بالفرح

والحلم كان غالى

تمنه دموع 

والم

والهم كيالى

تقل السمع

ضعف النظر

واتدهورت حالى

واجيب منين يازمن

سجان يفك  ساعة

عن حالى

لكن ياسجن بيرك غويط

وبابك للسماعالى

 وانافى السجن

نهار ممنوع

وليل م القمر خالى

قولى مين عليه الدور من سكات

من غير ملاوعة واقنعة

على شاب طاير

ولاعجوز من قهرته 

طق مات

ماتقولى يالا

اللى ركب قطر

ولا ف معدية ساب

اللى جاى واللى فات

ماتقولى مين عليه الدور من سكات

ليه تبقى بحر
وانا الموجة؟
تايهة عن برها
تتهجى دمعتها
في ضلوع المطر
خليك انت شط
ترتاح الموجة
تبوح بسرها
تكمل ضحكتها
بايقاع تا تاتي في

ماتحلفش 
عالتوبة 
دة اللى بينا كان
حلاوة زمان
وتقول واصدف
من غير حلفان

شباك صغير
بيطل على محطة
شايفة منه اعلان قديم
لسة طالعة منه ريحة النشا
مليان شروخ
مكتوب عليه للبيع
رفضت ابص عالكلمة
لان ببساطة
قلوبنا مش ..للبيع

رايحة فين ؟
وهناك مابقاش هنا
وهنا مابقاش هناك
توت توت نويت افوت
افوت لكم دمعى
وصلوات من غير تسابيح
يمكن تكملها الريح
واهو رايح
كل اللى جاى رايح
مايسيبش غير ريحة فراق
واهو فارق
الليل والنهار
وحدود النور والضلمة والاوليا
ماكانوش زمان قالوا
دنيا زايلة
واللى زايلين احنا
بس قليلين
اللى اتكتب لهم الخلود

لروح نادين شمس

ماتلونش الغيم
خليه رمادى
زى الدنيا
والناس
رايحة جاية
وبين بين

ياشهقة جاية من بعيد
شبه دخلة الروح فى البدن
تروى عيون عطشانين
م السراب
وسؤالهم تعب م السفر
,,,,,
مافيش حلم تاه
الا واتلقى
على اول عتبة للسؤال
,,,,,
وايه ينقص غيمة صغيرة
غير حبة دموع
وهوا مطمن لقوته
يزقها ؟

الروح بتئن وتتكسر وتعجز كما الابدان
والدنيا باصة
يمكن تضحك
يمكن تبكى
ويمكن تطرح سؤال لبنى الانسان
ايه الفرق بينك وبين الميت
غير ضحكة وطبطبة
وحبة احساس بالامان

عرفت السؤال
لكن 
كانت بتتهجى الإجابة
......
فات المعاد

لسة الغيوم
شايلة نفس الهموم
لسة النفوس
شايلة هم الغيوم
فين تودى دمعتك ياغيم ؟

ماتجرنحيش 
وتقول أداويكى
بحبة كلام
الجرح باقى
والكلام دوّار

ف عنيك كلام
ف عنيا ملام
احكى لى انت عالوجع
عن زحمة الغريب
فى وحدته
عن دمعته
عن سرحانه
فى ليله
فين سلوته
احكى لى انت عالوجع

روحك هى الاصل
واللى فى المراية
صورة
ومهما كانت الصورة وهم
والضحكة مصنوعة
هتبقى انت
الفكرة
وجوة الحكاية
انت البطل

لا غيابها هيهم حد غيرك
ولا غيابه هيزعل حد غيرٍك
فـ ماتوسعش حزنك وتتكى عليه
وسيب الصمت يرده / يردها
ادى سرك لغيمة
أو لوشوشة الودع

1- 
ماتداريش دموعك يا الغريب
دة الحزن ساكن الطريق 
ولا عاد يفارق المفارق
2-

كيف تدارى وجعك يا الغريب 
والدموع متفرقة ؟
3

ماتسيبش وجعك
 يفضحك ياالغريب
 وانت الغريق بين الصور
4-

لميت فى قلبك يالغريب كل الوجع
 مين يسمع ملامك ؟


  5-
 

على وتر جنونك ياالغريب
ماتعزفش غير غنوتك
لا الدمعة نازلة تبل ريق
والسكة نزفت خطوتك

خايفة بعد ما أسأل ما لاقيش إجابة
وانت كنت عنوان الاسئلة
وباب الاجابة
ليه النهاردة لما احتجتلك غبت
خايف تصدمنى الاجابة؟‎"

رحنا للبحر وحكينا للموج اسرار..وكتبنا عالرملة اسامينا وبينا عالرملة دار ..نفس الموج اللى حكينا له السر جه وهدم الدار ..ومش حانبطل
نروح البحر ولا حانبطل نحكى الاسرار ولامش حانبطل نبنى عالرمل دار

"‎ اهى دنيا واحداث من غير خيوط الخيوط مين بيشدها انت مين مهما تفوت حتموت والموت لغز ولا اجابة مين حلها ‎

"‎ولما الجنية جات وزارتك
ماقلتش ليه ابيع لك حنينى
وادينى بدل البعاد سنينى
وسكة قرب تفرك خطوتك

ياليل الغربة
دوس فينا
وسيب الدمع
يواسينا
الفرح بقى
قريب غايب
ولا حيطة عرفت
تدارينا

لسة العنين طيبين
بين السنين متفرقين
خدى ياغربة سنينك
وسيبى اوجاعى متفرقين

"‎ يحكى ان كان في ثورة هى وماشية لقيت حفرة الحكايا ت كترت ع الحفرة اللى يقول كان فيها جان واللى يقول فيها عفريت واللى يقول دول بنى انسان قاموا ولادنا رسموا رسمة على الحيطة وقالوا مناسبة وعاللى خانونا تفضل شاهدة لكن نعمل ايه فى الحفرة؟ شطار قالوا نسد الحفرة والشطار دفنوا الثورة وردموا الحفرة

‎الدنيا ف محبتك احوال
وانا حالى معاك مايل
درويش وداير بالموال
وايش يعدل المايل ؟

‎ياوعدى عاللى انكتب
ياخوفى عاللى انسعد
واللى داق م الغياب
واللى م النشوة
انجذب

ضاق الطريق
الكلام شق الفضا
السر مابقاش ف بير
وانت
على المسرح
ماتخاطبش الا نفسك
ماتعذبش الا نفسك
الكورس وراك يمكن يسقف
يمكن يسخط
او يبكى
والجمهور
يهيص
ينتشى
زى الممسوس م الشيطان

وهما نايمين بيندهوا 

 
على احياء 

 
على ميتين

 
خلينا متدفيين 
"
"
يا حبيبى

 
ليه الحب اول مايبتدى

 
بيتسرق

 
وتبقى الغنوة غربة

 
والموال حنين
"
"
نروح فين

والضلع اتخلق من حنين

وكانوا عارفين

ان الغياب 

 
ذنب

عايز الرجوع

توبة

و
دليل

لسة باكتب اى كلام

 
لسة قصايدى مااستوتش

 
زى طبخة 

 
لاناقصة ملح 

 
ولا زايدة صبر 
"
"
الكلام كان عالوشوش

 
بس ابويا ماتكلمش

 
المعنى كان ف قلبه 

وف عمق السؤال

الدنيا دارت ولفت

الاجابة مااتشافتش
"

يومها ماكانش البحر ملهم
ولا كنت هاكتب موضوع انشا عن الارض
كان بس الدم قدامى
والضحكة تايهة ف سكة ممطوطة
والجلد شداه ابرة
على طول المدى
الكتاب كان مفتوح
والعنين برضو
الوجع وقع من ع السور
الحلم كان اسخن من رغيف عيش
لحظة من الفرن خروجه
واصابع بتدق مع قلوب سهرانة
على حرف الالم
والدم شهيد
واقف بيحرس ميدانه

الجرافيتى اتمسح
بس الميدان موجود
الحارس مش بس دم
روح 
وجع 
وجع
روح
وقلوب
ورد
وبرد
دفا 
وكف مستنى يتحنى
ومااتكبرش ع التراب

لو عايز تبكى .. ابكى
بس ماترجعش تقول 
دموعى مابتنشافش
عشان ف عز نشوة البكا
الدموع مبتنشفش

مش باقى منى غير حبة دموع
لما يوم تفارق ينزلوا
تنزف شوارعنا
عشان فرحها
وتتمنى يوم لقا
يوم ماتشوف شهيد
تدعى له من قلبها
بلد وناسها الطيبيبن
متوحدين
على كلمة حب
فى الحياة ودنيا ودين
حبة حاجات
تشوفها تقول فتات
وتقول كدة خلصت
لكن لا
الحياة ليها الف معنى
والف سكة للخلاص
يامين يعيش
حبة حاجات
يوم ماتقول دة سفر
ويمكن يطول
ويامه ادعى لى
لو بس شوفتك
هى اللى هاقدر
ف يوم اطول
حبة حاجات
ومعاها حكايات
ناس راحت
وناس جاية
وناس هاتقابل وتحكى
وتقول دول يادوب
كانو حبة حاجات

‎\احس بالخداع \واحس بالوجع \اعرف انى واهم \اوشوش الودع \الحب قابله صد \والوجد باللوع \كان صورة \كان مراية \بقى حلم لا بقى فزع\

 

 

واخدانا الدنيا الكدابة\ بتلف بينا السنين\ تايهين ماعارفين\ رايحين ولا جايين\ وتشيل وتحط فيناعاملين نفسنا ناصحين \ناخد على دماغنا\نموت ونقوم من تانى\ يمكن لجايزة مستنيين\ولا بنشوف فايزة ولا جايزة\واتارينا كلنا مساكين

المظلوم ياولداه صوته بيتكتم \والعيشة صبحت معاه كما العدم\الظلم بقى عند الناس عادة\والحلم قبل ما يتولد يتعدم

 

ابتدينا وما انتهينا
والعمر مش بالسنين
نمشى خطوة
تزق خطوة
والذنوب شايلها مين
حلم تايه وسط موج
وصوت بيعلى اهة وحنين
ابتدينا وما انتهينا
غرق الكلام
فى ليل غامق حزين
صدى صوت باقى مابينا
وترنيمة باصة على
اتنين عاشوا م الهوى
مجروحين

  

يا ترى هايقولنا ايه الريس النهاردة؟
اعضاء المجلس (المزورين)الموقرين
هانرجع الكساء الشعبى للغلبانين
يلبسوا لون واحد
وايه فيها طول عمرهم مطحونين
وطنيين وعمرمهم ما هيتكلموا
ولو لبستهم شوك
ماهيطلعوا صوت انين
ياترى هايقول ايه عالتعليم؟
طبعا هايفضل التعليم مجانى
والدروس هاتفض برضو خصوصية
مافيش ايجابية ولا سلبية
اهو تعليم

وعالطريق اسمع غنايا
وردد مواويلى
سقيتنى فى النهار
كاس الهوى عطشى
والليل بقى عليك دليل
ويلى

رميت سرك جواي ومشيت
ظنونى لعبت بى وخبيت
ولما اللى بينا سكات
مواسم الوجع استنيت

حباية وجع
بيجروا
حباية وجع تانيين
مابقتش عارفة
سنينى اللى عايشانى
ولا الوجع ساكن
جوة السنين

تيجى ندخل جوة لعبة

نعمل روحنا ناسيين

اننا احنا

زى الاطفال

نفرح بفانوس رمضان

ولا بفزورة واحدة بعد الفطار

نمسح دمعة فرت من عين الكبار

زى عباد الشمس

ننام

مانعرفش عتمة المسافات

نرسم قمر وشه

كان بيضحك

ولف لناحية تانية

لما كبرنا ماشفناهوش

زى نهر بيجرى

بيروى

الارض الشراقى

بيدى ويبتسم

وسايب وراه

ليل طويل

وغربة حلت

عالوادى

ولما تخلص اللعبة

نلاقى كل شبر فاكرنا

من يوم مابكينا

ليوم ما شاف الشعر شيبنا

وعرفتنا عتمة الحارات

مش عايزة انام من غير احلام
ولا عايزة اصحى وعينى مقفولة
ولاصبح ييجى مافيهوش صلاة
ولاسين سؤال  اجابته مجهولة
ولافاتحة ف السر  نقولها
وف العلن الفوضى منقولة
صلبتوا الحلم ف قلب الليل
فوتوا  شباك  لنهار يعدى

ولا نعيش ف ليل
ودايرة مقفولة

حزينة وحزنى من خشب
يولع بنار الفرقة
يقيد ..حطب
وبدال الابتسامة
حطيت على وشى
علامات العجب

اه ياحلمى العفى
ياللى كنت ف يوم وفى
مافكرتش مرة اخونك
بس انت
ف يوم زهقت منى
وف ليلة قلت اختفى
زرعت فيك جنتى
حصدت منك غربتى
هاجرب حلم غيرك
يكون وفى
ومايفكرش ليلة يختفى

ابتدينا وما انتهينا

والعمر مش بالسنين

نمشى خطوة

تزق خطوة

والذنوب شايلها مين

حلم تايه وسط موج

وصوت بيعلى اهة وحنين

ابتدينا وما انتهينا

غرق الكلام

فى ليل غامق حزين

صدى صوت باقى مابينا

وترنيمة باصة على

اتنين عاشوا م الهوى

مجروحين

موجوع دايما ياورق الورد
م اللى شالك
واللى عينه عليك
حتى اللى شالك بحنية
وشمك سايب اثار ايده
بتجنى عليك
فات روحه متعلقة ف ريحتك
وفات قلبه ينادى عليك
موجوع دايما ياورق الورد
واللى عينه شافتك
وطالعة عليك
ماقدرش بايده يقطفك
وساب سهم من عينه
تصيبك وتجرح فيك

انا  وانت وحبة كلام فى الهوا
محبوسين
باين فى عينيا الهوا
دايب فى القلب  الحنين
تقرب شوية
تبعد شوية
تلمع فى العين دمعتين

ساعات اكتب وانا مبسوط

و اكتب وانا موجوع

و اكتب ف اى موضوع

والدنيا كلها موضوع خارج  عن النص

وعجبى

جربتوا  تشوفوا 

حد  بيتحرق
وصدقونى الفرجة ببلاش

مش حاتزعلوا

ولا تتألموا

لان اللى بيتحرق

من اول ماتعلم انه يحس

عرف انه

من زمان مات

الفرجة ببلاش

واللى شاف 

يقول انه ماشافش

غير حاجة كانت

خضرا

لا لا كانت بيضا

ومن كتر البياض

ماعرفش يشوف الحريق

الفرجة لسة ببلاش

والعيون شايفة

ومش شايفة

النور لما شقشق

والعصفور ابتدا يزقزق

كانت الدنيا بتناديه

يرفرف بجناحه

ويخبط على  حلم يلاغيه

الحلم خانه

قفل على شباك حنانه

وساب مرار فى حلقه

ماعرفش  يداويه

والفرجة لسة  ببلاش

واللى اتفرج مالتقاش

باللى خدالغربة سكة

وساب عبارة

فى البحر تايهة

ومالقيهاش 

والفرجة لسة ببلاش

الدنيا حكايات
ست الحسن
نامت
الشاطر حسن
ماصحاهاش
فيها البطل 
والمهزوم

فيها اللى مات مات

واللى عاش كأنه ماعاش

انا كنت هنا وصبحت هناك
وبين هنا وبين هناك
مسافات وحكايات
ياترى ياصاحبى
ياللى عرفتنى هنا
...هاتعرفنى هناااااااااك؟

افتح الكشكول
وف اول صفحة تقابلك اكتب
اى حروف تعبر عن اسم حبيبيك
ممكن 3 او 4 او 5 حروف
فيهم نبض
فيهم حب من غير خوف
سيبك من الوهم اللى هد حيلك
وخليك فى الحلم
ينور ليلك
ويشبك حروفك بالنجوم
وتحط صورة للحبيب من خيالك
وتخبيها من عيون السطور
وتبان بس لشوقك وحنينك
وتكتب جنبها حرفين بوح

ومعاهم كمان حرفين وجع
تخبى الكشكول فى اغلى حتة
وتنام
يالا افتح الكشكول

سجنت انا روحى

و الزمن سجانى

كتبت عالحيط

بريئة

و بالحق انا الجانى

دخلت السجن لقيت

م الحبايب كتير

والقلب مش خالى

حلمت 

والحلم كان غالى

والهم كيالى

تقل السمع

ضعف النظر

واتدهورت حالى

واجيب منين يازمن

سجان يفك  ساعة

عن حالى

لكن ياسجن بيرك غويط

وبابك للسماعالى

 وانافى السجن

نهار ممنوع

وليل م القمر خالى

لسة غنايا ماابتداش 

ومدن السراب

فردت عالطريق غربتى

تايهة

ومش لاقية حدود للمتاهة

تعرف خطوتى

لسة بكايا مابتاداش

والسكات سكن روحى

والعين سرسبت دمعتى

ياريت يا طريق غايبة

تغيبى والهم يسيب سكتى

لقيت على فرع الشجر الحزن متخبى

سألت ليه الليل  كف  بالهم متحنى

قال الحزن دة مكتوب ضمى الحروف ضمى
رديت وقلت الخوف مسك الحروف منى

سبت الخلايق هناك
وجيت اتشعبطت هنافى كمى
شوفت الحروف مرايات
والحبر كان دمى

4