هى هى نفس البداية
لنفس الحكاية
كلمة حلوة
وردة حمرا
وقصيدة مليانة
دموع وبكا
كلمة تجر كلمة
حدوتة فـ غنوة
وانا يصعب عليا
المجروح
واللى بأنينه يبوح
بكل حنية اديه عنيا
ولا ف يوم اشوف حبيبى
مخطوف منى لحزن وخوف
ادارى دمعى
واشيل اسايا بين ضلوعى
واسيب رسايل
يبعتها قلبى
يسأل عليه
يجينى رده
ماتخافيش
انتى اللى فى القلب
والروح من غير وجودك
ماتساويش
بكل طيبة اصدقه
احط زى الحمامة
بين ايديه
يسافر... قلبى يسافر
اليه
يبعد.... تكون روحى معاه
ملاك يحرسه
ويناجيه
واعيش فـ وهم اسمه حبه
يجينى صده
ويفارقنى
ويقول قدر
ويقول مش عارف اعيش
ولسة الحكاية معايا
ماانتهتش
تبتدى نفس البداية
مع واحدة تانية
كلمة حلوة
وردة حمرا
وقصيدة..وووو
والحكاية مابتنتهيش
والحكاية مابتنتهيش
ليست هناك تعليقات:
إرسال تعليق